حبيبتي هو توبك الابيض مش ناوية تلبسيه ؟
من زمان بجهزه مش ناويه مرة تقيسيه ؟
يمكن يطلع مقاسك ..
ويعجب ناسك ..
جربيه ..
... ... ...
من زمان وانا كان كل همي فيه ..
وانت في كل مرة مصرة ترفضيه ..
خايف انا من احساسك ..
ومن ناسك ..
عليه ..
... ... ...
كنت مصرة تبعدي معرفش ليه ؟ ..
واجيلك تهربي طب بتعاندي ايه ؟ ..
مفضلش غير اني اجمع ناسك ..
ونوقف في قلب احساسك ..
وللدنيا اوريه ..
... ... ...
اتغيرت الدنيا واللي عملته محدش راضي بيه ..
هو انت مقولتيش من الاول انك سجينه ليه ؟..
واللي سجنوكي هم حراسك ..
بايعينك وكنت فاكرهم ناسك ..
مقولتيش من بدري ليه ؟..
... ... .... ...
رفعت انا توبك في السما لأجل انت تشوفيه ..
وحلفت بعمري لاجيبهولك وبايديا تلبسيه ..
واتاري فيه كتير من عشاقك ..
اتجمعوا لاجل يفكوا اصفادك ..
وجابوا توبك .. شوفتيه ؟
... .... ...
ادانك .. جمع عشانك .. كل اللي بتحبيه ..
وفي كعبة غرامك .. سجانك .. معرفش يعمل ايه ..
وما سكتوش عشاقك ..
هزموا سجانك ..
وتوبك هتلبسيه ..
... .... ...
شايفه احبابك .. دا يوم مش هتنسيه ..
كعبتك جالها من كل مكان اسمك عليه ..
اعلنوا الغضب علي سجانك ..
حالفين يموتوا علشانك ..
جه اليوم تحصدي اللي زرعتيه ..
..... .... .... ....
اتجمع المتفرقين علي حلم من زمان انت بتحلميه ..
اللي واقف .. واللي واقع .. واللي الرصاص خد عينيه ..
واللي بدمه كتب اسمه علي اعتابك ..
لاجل توب حريتك ييجي علي مقاسك ..
عارفينك دمنا مش هتنسيه
