لساي صغير يا أمه

لساي صغير يا امه ..
لساي بحتاج للضمه ..
لساي بخاف ..
م الضلمه ..
وصراخ الحريم ..
ومشي الجنايز ..
واللمه ..
خليني في ايدك يا امه ..
لساي بأحبي ..
لساي بأحكي ..
لسه الكحة بتاعة جدي ..
بتضحكني ..
لسه عصاية ابويا ..
بتحركني ..
العيد داخل يا أمه ..
وهالعب مع العيال ..
ونعمل لمه ..
وقرعة ..
علي مين يتغمي ..
لسانا هنلعب يا أمه ..
وعم حسين ..
راح يجري ورانا ..
ساعة القيالة ..
يا أمه ..
جهزتي العيدية ..
زي ما ابويا جاب الجلبية ..
وصديري صغيرعلي قدي ..
وصندل احمر برباط ..
في الشمس يضوّي..
يا أمه ..
هاتي العيدية ..
فكي المنديل يا أمه ..
هاتي الفكة ..
وعلي وشك زي العادة ..
اجمل ضحكة ..
لأجمل أم ..
لساي صغير يا أمه ..
لساي بحتاج للضمه ..